ಮುಸ್ಲಿಂ ಮಹಿಳೆಯರನ್ನು ‘ಹರಾಜು’ ಮಾಡಲು "ಸುಲ್ಲಿ ಡೀಲ್ಸ್" ಪ್ರಯತ್ನ- ಕೇಸು ದಾಖಲು

ವರದಿಗಳ ಪ್ರಕಾರ, ಪ್ರಮುಖ ಪತ್ರಕರ್ತರು, ಕಾರ್ಯಕರ್ತರು ಮತ್ತು ಕಲಾವಿದರು ಸೇರಿದಂತೆ, ಮುಸ್ಲಿಂ ಸಮುದಾಯಕ್ಕೆ ಸೇರಿದ ಸುಮಾರು 90 ಮಹಿಳೆಯರ ಚಿತ್ರಗಳನ್ನು "ಸುಲ್ಲಿ ಡೀಲ್" ಎನ್ನುವ ವೆಬ್ ಸೈಟ್ನಲ್ಲಿ ಹಂಚಿ,  ಮಹಿಳೆಯರನ್ನು 'ಹರಾಜಿನಲ್ಲಿ' ಇರಿಸಲಾಗಿದೆ.   ಮಹಿಳೆಯರಲ್ಲಿ ಹೆಚ್ಚಿನವರು ಭಾರತೀಯರಾಗಿದ್ದರೆ, ಅವರಲ್ಲಿ ಕೆಲವರು ಪಾಕಿಸ್ತಾನಿ ಪ್ರಜೆಗಳೂ ಸೇರಿದ್ದಾರೆ. ಹಂಚಿಕೊಂಡ ಮಹಿಳೆಯರ ಚಿತ್ರಗಳನ್ನು ಅವರ ಸಾಮಾಜಿಕ ಮಾಧ್ಯಮ ಹ್ಯಾಂಡಲ್‌ಗಳಿಂದ ಪಡೆಯಲಾಗಿದೆ. 'ಸುಲ್ಲಿ' ಎಂಬುದು ಮುಸ್ಲಿಂ ಮಹಿಳೆಯರಿಗೆ ಅವಹೇಳನಕಾರಿ ಪದವಾಗಿದೆ.

ಮುಸ್ಲಿಂ ಮಹಿಳೆಯರ ಚಿತ್ರಗಳನ್ನು ಹಂಚಿಕೊಳ್ಳುವ 'ಸುಲ್ಲಿ ಡೀಲ್ಸ್' - ವೆಬ್‌ಸೈಟ್ ಅನ್ನು ಆಯೋಜಿಸಿದ್ದ ಗಿಟ್‌ಹಬ್‌ನಿಂದ ಟ್ವಿಟ್ಟರ್ ಬಳಕೆದಾರರು ಸ್ಕ್ರೀನ್‌ಶಾಟ್‌ಗಳನ್ನು ಹಂಚಿಕೊಂಡ ನಂತರ ಈ ವಿಷಯ ಬೆಳಕಿಗೆ ಬಂದಿದೆ. ಮಹಿಳೆಯರ ಚಿತ್ರಗಳನ್ನು ಹಂಚಿ, 'ದಿನದ ಒಪ್ಪಂದ' ಎಂದು ಲೇಬಲ್ ಮಾಡಲಾಗಿದೆ. ವೆಬ್‌ಸೈಟ್ ಅನ್ನು ಈಗ ಬ್ಯಾನ್ ಮಾಡಲಾಗಿದೆ ಎಂದು ವರದಿಯಾಗಿದೆ.

ಮುಸ್ಲಿಂ ಮಹಿಳೆಯರ ಚಿತ್ರಗಳನ್ನು 'ಗಿಟ್‌ಹಬ್' ಅಂತರ್ಜಾಲ ವೇದಿಕೆಯಲ್ಲಿ ಅಪ್‌ಲೋಡ್ ಮಾಡಿ ಪ್ರಸಾರ ಮಾಡಲಾಗುತ್ತಿದೆ ಮತ್ತು ಅವರ ವಿರುದ್ಧ ಅವಹೇಳನಕಾರಿ ಪದಗಳನ್ನು ಬಳಸಲಾಗಿದೆ ಎಂಬ ಬಗ್ಗೆ ವಿವರವಾದ ವರದಿಯನ್ನು ಕೋರಿ ದೆಹಲಿ ಮಹಿಳಾ ಆಯೋಗ (ಡಿಸಿಡಬ್ಲ್ಯೂ) ದೆಹಲಿ ಪೊಲೀಸರಿಗೆ ನೋಟಿಸ್ ನೀಡಿದೆ. ಈ ವಿಷಯದ ಬಗ್ಗೆ ಸು-ಮೋಟೋ ಕಾಗ್ನಿಜೆನ್ಸ್ ತೆಗೆದುಕೊಂಡು, ಡಿಸಿಡಬ್ಲ್ಯೂ ಮುಖ್ಯಸ್ಥ ಸ್ವಾತಿ ಮಾಲಿವಾಲ್ ದೆಹಲಿ ಪೊಲೀಸರಿಗೆ ಪತ್ರ ಬರೆದು ದಾಖಲಾದ ಎಫ್‌ಐಆರ್ ನಕಲನ್ನು ಕೋರಿ, ಇದುವರೆಗೆ ಆರೋಪಿಗಳ ವಿರುದ್ಧ ಕೈಗೊಂಡ ಕ್ರಮಗಳ ವಿವರಗಳನ್ನು ಕೋರಿದ್ದಾರೆ.